Hardangeraksjonen

Aksjonssesongen startar opp att i Hardanger. Når Hardanger er i full bløming, held Statnett fram med bygginga av dei kontroversielle høgspentmastene  gjennom eit av verdas mest anerkjente fjordlandskap. Hardangeraksjonen varslar vidare kamp mot mastene og energipolitikken regjeringa fører.

«Hardangeraksjonen er spesielt viktig i ei tid der olje- og energiminister Ola Borten Moe lovar ei storstilt utbygging på Vestlandet», seier Lars-Helge Ljone, leiar for Hardangeraksjonen. «Fleire master i unike naturlandskap og fleire vasskraftverk skal byggast, men til kva nytte? Noreg er sjølvforsynt med rein energi. Me burde heller støtta fornybarsatsing i andre land økonomisk, i staden for å bygga ned dei siste 12 % av vår eigen urørte natur av den eine grunnen å tena oss endå rikare», avsluttar Ljone.

Vi er no i den andre sesongen for bygging av «monstermaster» i Hardanger. Sist sommar var prega av mangedemonstrasjonar og aksjonar. Over 200 personar deltok i ulovlege aksjonar og fleire sindige, elles lovlydige samfunnsborgarar frå fjern og nær vart sette på glattcelle i Bergen og bøtelagde.

I fjor sommar bagatelliserte Statnett betydninga av desse aksjonane. I vinter endra dei mediestrategien sin (sikkert med godt betalte informasjonskonsulentar) og hevda i ei pressemelding at aksjonane hadde vore veldig dyre for prosjektet og hengte dessutan på at aksjonistane hadde sabotert utstyr og sett liv og helse i fare. Dette siste er definitivt oppspinn.